როგორ მუშაობს პროგრამატიკული მარკეტინგი და რა უპირატესობები აქვს მას

ციფრული ინდუსტრიის მასშტაბებმა და ტექნოლოგიების განვითარების სწრაფმა ტემპმა სარეკლამო ინდუსტრიაში ახალი მიმართულებების შექმნა განაპირობა. მათ შორის მოწინავე პოზიციებს პროგრამატიკული მარკეტინგი იკავებს. Statista – ს პროგნოზით, 2026 წლისთვის პროგრამატიკულ რეკლამაზე დახარჯული თანხა 725 მილიარდ ამერიკულ დოლარს მიაღწევს.

ამ ბლოგით შევეცადეთ, პასუხი გაგვეცა კითხვებისთვის: რა არის პროგრამატიკული რეკლამირება; რომელ ტიპებს გამოყოფენ პროგრამატიკულ რეკლამაში; როგორ მუშაობს და რა უპირატესობებით გამოირჩევა პროგრამატიკული მიდგომა.

რა არის პროგრამატიკული რეკლამირება

პროგრამატიკული რეკლამირება რეკლამის შეძენისა და გაყიდვის ავტომატური პროცესია. სარეკლამო სივრცის ყიდვა-გაყიდვა ცოცხალ რეჟიმში მიმდინარეობს ავტომატიზებული სისტემის დახმარებით, რომელსაც DSP(Demand Side Platform)-ს უწოდებენ. რეკლამირების აღნიშნული მეთოდი სარეკლამო აგენტებს შესაძლებლობას აძლევს, რეკლამა სხვადასხვა მედიაარხზე ავტომატურად განათავსონ.

ტრადიციული რეკლამირების შემთხვევაში რეკლამის განმთავსებლები (ე.წ. ედვერთაიზერები), როგორც წესი, გაზეთს, ჟურნალს, ვებგვერდს უკავშირდებიან, რათა მათი სარეკლამო სივრცე გამოიყენონ. პროგრამატიკული რეკლამირების დროს კი DSP-ს პლატფორმაზე რეკლამის შექმნითა და შესაბამისი პარამეტრების არჩევით სისტემა თავად უზრუნველყოფს ბიზნესის მიერ დასახული მიზნების მიღწევას.

პროგრამატიკული რეკლამირება სააგენტოებსა და რეკლამის განმთავსებლებს გამომცემლების (ე.წ. ფაბლიშერების) სარეკლამო ადგილებზე ინდივიდუალური შეთავაზებების ავტომატიზაციის შესაძლებლობას აძლევს. თავად პროგრამატიკული სისტემა კი მრავალ მედიაარხს მოიცავს,  რაც რეკლამის ერთდროულად რამდენიმე ვებსაიტსა თუ აპლიკაციაში განთავსებას უწყობს ხელს.

რეკლამის განმთავსებლებს DSP-ს პლატფორმაზე სამიზნე აუდიტორიის შერჩევა შემდეგი პარამეტრების დახმარებით შეუძლიათ:

1. დემოგრაფიული ( სქესი, ასაკი…)
2. ხელსაწყოს ტიპის მიხედვით (ლეპტოპები, მობილურები, ტაბლეტი…)
3. ინტერესების მიხედვით (UX დიზაინი, კოდინგი, აპის ოპტიმიზაცია)
4. ქცევის მიხედვით (მაგ.: არის თუ არა რეალური მყიდველი)

როგორ მუშაობს პროგრამატიკული მარკეტინგი?

პროგრამატიკული მარკეტინგის 5 ძირითადი კომპონენტი განსაზღვრავს მედიასაშუალებებში რეკლამის განთავსებას. ესენია: Demand-Side Platforms, Supply-Side Platforms, Ad Exchanges, Ad Servers და Data Providers.

Demand-Side Platforms – მოთხოვნის მხარის პლატფორმას სარეკლამო აგენტები რეკლამის გასავრცელებლად იყენებენ. DSP საშუალებას აძლევს ბრენდებსა და სააგენტოებს, შეიძინონ სარეკლამო ინვენტარი გამომცემლებისგან. აღნიშნული სისტემა სააგენტოებს ეხმარება ისეთი ფაბლიშერებისა და არხების შერჩევაში, სადაც პროგრამატიკული კამპანიის გაშვება ეფექტური იქნება და მათ სასურველი მიზნების მიღწევაში დაეხმარება. Real-time bidding (RTB)-ის დახმარებით DSP-ს სისტემა რეკლამის განსათავსებლად სარეკლამო სივრცეზე განაცხადს ბიზნესის სახელით აკეთებს.

Supply-Side Platforms – ე.წ. მიწოდების მხარის პლატფორმაა, რომელსაც გამომცემლები იყენებენ, რათა სარეკლამო აგენტებმა მათ რადიოსადგურებზე, ვებგვერდებსა და ტელეგადაცემებში რეკლამა განათავსონ.

Ad Exchanges – აღნიშნული პლატფორმა DSP-სა და SSP-ს დამაკავშირებელი სისტემაა, რომელიც აუქციონისა და „ბიდინგის“ პროცესს წარმართავს. ასევე განსაზღვრავს, რომელმა რეკლამამ მოიპოვა ადგილი კონკრეტული გამომცემლის სარეკლამო სივრცეში.

Ad Servers – მას შემდეგ, რაც კონკრეტული რეკლამა ტენდერში გაიმარჯვებს, სწორედ სარეკლამო სერვერი განათავსებს მას გამომცემლის სარეკლამო სივრცეში.

Data Providers – რეკლამის წარმატებისთვის მონაცემთა პროვაიდერები აზიარებენ სპეციფიკურ, დემოგრაფიულ, გეოგრაფიულ ინფორმაციას, რათა სამიზნე აუდიტორია სწორად შეირჩეს.

მოთხოვნის მხარის პლატფორმების მაგალითებია: mediasmart, AdRoll და RollWorks.

რა ღირს პროგრამატიკული რეკლამა?

პროგრამატიკული რეკლამა, როგორც წესი, ყოველ 1000 ჩვენებაზე (impressions) „იჩარჯება“, ხოლო ყოველი 1000 ჩვენების (impressions(CPM) ღირებულება 0.10 ცენტიდან $2-ამდე მერყეობს. ეს ფასი ტრადიციული რეკლამის ფასთან შედარებით საკმაოდ ხელმისაწვდომია.

პროგრამატიკული რეკლამირების უპირატესობები

• ეკონომიური ბიუჯეტი – ის შედეგების ცოცხალ რეჟიმში მონიტორინგის შესაძლებლობას იძლევა. რეკლამის განმთავსებლები მხოლოდ იმ რეკლამებში ხარჯავენ ფულს, რომლებიც მათთვის ეფექტიან შედეგებს უზრუნველყოფს.
• KPIs – წარმატების მაჩვენებლის შეფასება რეალურ დროში მიმდინარეობს.
• სამიზნე აუდიტორიის შერჩევის მრავალფეროვანი ხელსაწყოები – რეკლამის ტარგეტირებისას სპეციფიკური პარამეტრების გათვალისწინება, რაც სარეკლამო აგენტებს პოტენციურ მყიდველამდე ინფორმაციის მიტანაში ეხმარება (LOCATION, DEVICE, DAY&TIME, VIEW RATE, MOBILE CARRIER, HYPERLOCAL AND URL TARGETING).
• ACTIVITY BASED აუდიტორიების შეგროვებისა და მათი რემარკეტინგისთვის გამოყენების შესაძლებლობა;
• დინამიკური SHOPPING ADS (E-COMMERCE) რემარკეტინგის ავტომატიზაცია. პლატფორმა აანალიზებს მომხმარებლის ქცევას და მის მიერ ნანახ ან მსგავს პროდუქტებს სხვა ვებგვერდებზეც აჩვენებს.

პროგრამატიკული რეკლამის ტიპები

Display Ads – აღნიშნული ტიპის რეკლამები ვებგვერდებზე ჩნდება და მათი განთავსება სხვადასხვა ადგილას არის შესაძლებელი (header, footer, or sidebar). რეკლამის განმთავსებლები თანამშრომლობენ DV360, Admixer TradeDesk, Pubmatic, Google Marketing Platform, Knorex, Jampp, Smadex, MediaMath, The Trade Desk, Amazon DSP, Yahoo! Ad Tech, Beeswax, Conversant, Quantcast, Basis, Cox Automotive-ის პლატფორმებთან, რათა Display Ads ფორმატები გამოიყენონ.

Video Ads –  ვიდეორეკლამა რეკლამის ერთ-ერთი პოპულარული სახეობაა, რომელსაც რეკლამის განმთავსებლები იყენებენ. ვიდეორეკლამები შეიძლება გამოჩნდეს ვიდეოს დაწყებისას, დასრულებისას, მიმდინარეობისას ან ლაივსტრიმინგის დროს (Video ads in-display, pre-roll, mid-roll, post-roll, in-stream და out-stream).

Social Ads – სოციალურ მედიაში გავრცელებულ რეკლამებს მოიხსენიებენ, როგორც Social Ads.

Connected TV – როგორც წესი, აღნიშნული ტიპის რეკლამები პროგრამატიკულია.

ბლოგის ავტორი: გვანცა ფორჩხიძე

კორექტორი: ირმა ჯოხაძე